= انت مريض.. كنت بحبك لما كنت تستحق الحب. دلوقتي انت ولا حاجة.. عارف يعني ايه ولا حاجة؟؟.. انا لما اتجوزتك.. حبيتك.. حبيتك عشان كنت اماني.. كنت كل حاجة ليا ف الدنيا.. انا بعترفلك دلوقتي اني كنت عبيطة.. ويمكن اكون اصلا عمري ما حبيتك.. انا معرفتش غيرك قبل الجواز.. اديتك كل حاجة عندي. كل مشاعري اللي ربنا حطها ف قلبي كانت لك.. وبعد الجواز كملت انت اللي بدأوه أهلي.. حبستني.. منعتني عن الناس ومنعتني حتى عن اصحابي.. احبطتني من الشغل.. من الدراسة.. حتى الرسم اللي كنت بحبه احبطتني.. وكل ده وانا راضية وموافقة اعيش طول عمري عشانك.. انت بقا عملت ايه؟..
انت شفتني ست بسيطة يا عيني.. متعرفش حاجة ف الدنيا.. لو انا معرفش حاجة ف الدنيا ف ده بسببك ولو انت شايفني مش بفهم ف حاجات كتير ده لانه انت ناقص يا عمر.. الناقص بيخاف من نجاح التانيين.. ودلوقتي اقدر اقلك اطلع بره!
– كل ده!!!.. كل ده يا منى؟؟؟؟؟
= واكتر من كده بكتير.. لكن انا بكلم واحد أعمى القلب والضمير.. ولو ضمير حكم لك تتجوز عليا وتبيع وتشتري فيا ف ضمير ظالم وحكمه باطل زي حكمك.. القضية هكسبها وهخلعك!
– يا منى انا بحبك.. والله العظيم بحبك..
اسمعيني واطلبي اللي انتي عايزاه
= مش عايزة منك حاجه
– بحبك يا منى.. عيل وغلط يا ستي.. مش هتسامحيني؟. انا مستعد اطلقها.. مستعد ابـ,ـوس ايدك ورجلك كمان لو عايزه.. بس عشان خاطري تخليكي معايا.. انا بحبك
= كفاية يا عمر.. نفسي ارتاح بقا.. تعبت… والله العظيم تعبت
– تفتكري هترتاحي واحنا متطلقين.. هترتاحي واحنا بنحب بعض بس متفرقين والاولاد متشتتين بينا؟؟
= عايز ايه يا عمر
– نرجع.. وهطلقها
*************************
= عمر؟؟ إيه اللي جابك؟
– جاي اعتذرلك يا سارة
= بعد ايه.. بعد ما قلت اني خربت بيتك؟
– حقك عليا يا حبيبتي. انا اتجننت لما لقيتها رافعة خلع… مش انا اللي واحدة تخلعني
= هتعمل ايه طيب؟
– هرجعها البيت